~ ظـــــــاهره اشوفها في دولتين بس ,,,الإمـــــــارات وقطـــر,,ليش؟؟!!~

[~ الهـــالـــه~]

السلااام عليكم ,, مرحبااا بالي دش شخباركم وعسااكم بخير ,,,اول مره اشارك في هالقسمم ترا ماعرف اعرض مشكله واسوي مقدمات ومقبلات ,,,تراني ع قد حالي و اكتب الي في بالي @@صارت قصيده :D

نرجع الي محور حديثنااا :mad:

والله هالموضوع قاعده افكر فيه شو السبب ؟؟ وليش بالذات اشووفه في الامارات وقطر ؟؟؟

وهو " السيارات وشل بتايرين ؟؟؟"

عندنا شباب في العايله فيهم هالمرض ""قصدي من هالنوعيه ,,

,وشفت عندهم مره افلام لمسابقات شل ع تايرين فيه الي في قطر وفيه مسابقات في الامارات,!!!

عباره عن لعب بسياير وشلها على تايرين ,,وتصيح ويلات "جذي نسميه عندنا في الامارات " تفحيط يعني ,,,وتفجير بتواير ,,

ويركبون اصوااات لسيارت تستوي جنهاا دراجه يسمونها " الهيدرز"

,,صوتها ينسمع من اخر الدنيا ,,مززززززعج

مره ركبت ويا اخويه وهو فيه الله يعافيكم هالحاله الميؤوس منها ,

,يقووولي شرااايج بصووت سياره ,,حلوو صح؟؟ ,,قلتله : وااااايد حلوو ,,شرايك تشركها في نجووم الخليج ,,,

صوتها الله لا يوريكم ,,اشك انه ثقب الاوزون سببه اصوات سياير عيالنا مب الغازات السامه ,,,!!

عندنا هالشباب عيالنا الي في العيله مره راحين قطر عند ربعهم يشوفون اليديد شوو !!

ومره هذيلاك ياااين صوبناا يشوفون اخر التطورات $$ وكل همهم سياير وتوايرهاا ,,,!

والمشكله ماشفت دول خليجيه غير الامارات وقطر فيها هالاهتمام الزاايد

هذي مسابقات ما اختلفنا حالها حال الرالي ,,,,

لكن هذي الحركات صاارت حتى في شوراع ,,,في كل مكان فيه شارع ,,,في هالنوعيه من الشباب ,,

مب قصدي انه ازعااج ,,,,خلهم يزعجونا ,,,المشكله هي

صارو هالشباب ويا الموت " بالانجليزي " فيس تو فيس ..!!

والله قلبي يعورني كل ما اسمع مووت شاب بسبت هالخبال ,,,

سو احصائيه عندنا لقو ارتفاع هااائل في نسب الحوادث واكثرهم من فئة الشباب ,,

مادري هل انا على غلط ؟ هل هذي صدق مسابقة تستاهل ان تقام ؟؟ ولا شو رايكم ؟

وشكرااا

[الفيصل]

الله يعافينا مما ابتلاهم به :)

المرااهقه وماتسوي ولكن مراااهقة شيااب:)

انا اشك عقولهم شوي فيها فرااغ الله يحمينا

بس حلات هالصووت ايام الربيع في النعيريه والصمان :)والصرار امش ياوضاح :)


هالموضووع كثير الكلام فيه بس ماحد يفهم من هالنوعيه

بس اعرف كتير من ربعي كانو نفس هالنوعيه بس لي كبرو يعقلوون

يعطيك العافيه مسس خالتو


الفيصل

[~ الهـــالـــه~]

الفيصل
صح مثل ما قلت المراهقه ,,,مشكله في اتم المراهقه عنده لين عقب 20 سنه هذا شنسوي فيه !!

ونفهم من كلامك يعني انته ما كنت مثلهم @@

الله يكثر من امثالك يا الفيصل ,,,,

لاتنغر عاد @@

تسلم على المرور ابن اختي ,,,

[الجوووري]

بنت أمـير سابق


ملاحظتج في محلها ، بس في إعتقادي ما تقتصر على قطر والإمارات بس ولكنها تمتد لتشمل باقي

دول الخليج وإن كانت مُلاحظه في بلادنا بشـكـل أكـبر ..

أعتقـد أن حُب التقليد بين الشباب هو السبب في انتشار هذي الظاهره بل التنافس فيما بينهم في تزويد

سياراتهم بهذي الأشـياء المُـزعجـه علشـان يشعر هذا الشاب بأنه مميز عن غيره .

ويا شينه من تقليد ، يعني لو كان في أمور نافعه ومفيده للغير قلنا مايخالف لكن الشباب الله يهداهم

تفكيرهم ما أدري اشلوون صايـر ..

واعتقد أن العمر له دور كبير بعد في انتشار هذه الظاهره بين صغار السن من الشباب ، لأنهم في مرحلة

طيش ويحبون يجربون كل شي ..

وبعدين ما في قوانين رادعه لهذي الفئه من الشباب اللي تسبب الازعاج للعالم ( يبسطون أنفسهم على

حساب غيرهم ) .

ويمكن يكـون لقلة الوعي الديني له دور في هذا الموضوع : فالرسول ( صلى الله عليه وسلم ) يقول : " لا

ضــرر ولا ضـرار " وهم في أفعالهم هذه يؤذون أنفسهم بالدرجة الأولى والآخـرين ، وما يمر علينا يوم إلا

وسمعنا بوفاة شاب في عمر الزهور ولين بحثت عن الاسباب تكتشف أنه كان ( يتحدى ، يتسابق ، يطلع

قوة سيارته ) أمام باقي الشباب ..

ما عندهم إحساس بمشاعر أهاليهم وخوفهم عليهم ، وما يدرون بحجم الحسرة اللي بيخلفونها في نفوسهم

بموتهم بهذه الطريقة ..


هو تسابق على الموووت وأي واحد بيفارق الدنيا أسرع من الثاني ، الله يهدى الجميع إن شاء الله ..

والله سبحانه وتعالى يقول : ( ولا تلقــوا بأنفسـكـم إلى التهـلكه ) واللي نشوفه هاليومين العكس من ذلك

تماما ..


أرى أن تكون هناك توعيه بهذه الأمور منذ الصغر من خلال الأسرة والمدرسة ووسـائـل الإعـلام ووزارة الداخليـة من حيث عمل ندوات توعويه وإرشاديه وإصدار النشرات الإرشاديه بشكل أكبر وبمتابعه مستمره منهم ..

و كفايه ما فقدناه من أرواح شبابنا ..


كلمة أخـيـره : إلى الشباب من فئة الطيش والتسابق وغيرها من هالحـركـات الخـطــره اللي يسوونها بسياراتهم أقووول لهم :



اتقوا الله في أمهاتكم وأبائكم وأهاليكم جميعاً .. ولا تجعلوا الحزن رفيقهم الدائم بعد رحيلكم



اتقـوا الله في أنفسكم فهي أمانه ولا يحق لأحد بأخذها غير الذي خلقها





ودمــتـــم ســــالــــــمــــــيـــــن







بنت أميــر ســابــق





لــكِ أصـــدق الـــود





الـجـــوووري

[ضآآآمي]

موضوع التفحيط عموما منتشر في الخليج وبشكل قاتل
لكن فعلا مثل ماقالت بنت امير سابق طريقه ( الشل على كفرين او تايرين ) منتشرة بس في قطر والامارات
وهذا نوع من الاحتراف صراحه وهي اقل انواع الاستعراض خطر
اما الرياض وشارع الاصفر فهناك حصد للارواح بطريقة عشوائية وبلهاء
بحيث تمر السيارة في كامل سرعتها ويسحب لها الهاند بريك واللي قدامها تشيله
والمشكلة الجمهور يموتون كل يوم ولا يرتدعون
ياحليلهم اهل قطر واهل الامارات

بنت امير سابق
تحيتي لك ,,,

[يمك دروبي]

بنت امير

طرحك مميز

ومناقشه لظاهره منتشره وبكثره بين شبابنا

قد يكون جهل او قلة وعي

الاكيد للاهل دور بالتوعيه

وللرفاق الاثر الاكبر بتصرفات الشخص

ظاهرة الشل منتشره بكثره في قطر والامارت

كما ان ظاهرة الاستعراض منتشره بشكل مفزع بالسعوديه

وكلها تحصد الارواح

لكن اخس ظاهره كانت الديك والدجاجه

وهي كل واحد بموتره ويمكن يكون معاه ربعه

يجي كل موتر من اتجاه اللي يخاف هو دجاجه والثاني الديك

واذا الثنين دياكه وهنا المشكله يصير تصادم وجه لوجه وتحصد ارواح






بنت امير شكرآ لهذا الطرح






لكِ كل اطواق الياسمين






يمك دروبي

[~ الهـــالـــه~]

الجوووري

اتقوا الله في أمهاتكم وأبائكم وأهاليكم جميعاً .. ولا تجعلوا الحزن رفيقهم الدائم بعد رحيلكم

تعليقج على الموضوع وااايد حلوو ,,,وكلمتج في مكانها ,,,الشاب يدفع حياته ويذبح اهله بحياتهم والله صعبه ,,,

تسلمين الجوووري على التواجد الاكثر من راائع


ضآمي

ياهلاا ومرحباا ,,صحيح ماقلت انه كل يوم تستوي حوادث وتروح ارواح
وفيه يكوون من ربعهم ومن معارفهم ولكن مستمرين ,,,ليش مادري !!

شكراا لتواجدك الجميل اخوي ضامي

يمك درووبي

يامرحباا الساع ,,,

قلة الوعي اخالفك فيها ,,,عندهم وعي وعارفين انه خطر بس مثل الي ضامن نفسه ما راح يصيبه شي !,,

وحركة الديايه والديج هذي اول مره اسمع فيهاا ,,,شكلك يمك دروبي لاعبنهاا قبل @@@

وشكراا على التواااجدك الرائع ,,وشكرا على طوق الياسمين ,,احس نفسي بفيلم هندي :D


شاكره لكم التواجد ياا الجوري ,,,ضامي ,,,,يمك دروبي

[لــورا]

.


.


عندنا وعندكم خير

شبابنا ما يجيهم خبالهم إلا اذا نزل المطر

تعالي شوفي الشارع والتفحيط والله يرمون

أرواحهم الى التهلكه .

كل اللي نقوله الله يهديهم


وشكرا لك بنت أمير


.


.

[~ الهـــالـــه~]

لورا ,,,,هيه صح صدقتي خاصه يوم يطيح مطر ,,,احتفالات ماتخلص

تسلمين ع طله الحلوه يا لورا

[معروف]

بنت امير سابق

مشكله تعرض هنا من اهم هذه المشاكل في الحياه

قبل البدء في الضرب بالصميم على الكلام

فنقووول لو الشاب مات الحاله من هذه ماعليه حسووفه

لاكن لو اخذ معه عائله مثل ماحصل في مدينة الرياض

الشاب الذي كان يستعرض قواته في التفحيط واخذ معه عائله كامله
في يوم العيد وهذا حدث فعلا وصحيح وطلع بالجرائد ولم ينجوا الا طفل صغير

.
.
.


ماذنب ذاك الطفل في مهاترات الشباب الذين لايراعون امهات تنتظرهم
واباء واخوان وغيره ممن يريد منهم الصلاح او الرجوع اليهم

وعدم دخولهم في الحزن

.
.
.


المراهقين قلنا هم مراهقين ولاكن هل الشباب الذين توصلوا واخلو بسن المراهقه
والذين لابد ان ينصحون غيرهم من تلك الفئه هل نسميهم مرضان العصر
.
.
.
.


تفاهات الشباب والغرب لايحصل عندهم الا الاختراعات وغيره

لقد وضعوا جهودهم في الرياضه والسيارات الاسرع وغيرهم

والغرب في الاختراعات والمستقبل الحر


الله يهديهم جميعا ويثبتهم على الدين الاسلامي


بنت امير سابق الله يهدي اخوك وادعيله بالصلاح

هناااا


معروووف

[~ الهـــالـــه~]

معرووف

ياهلا ومرحبااا

صحيح لي قلته من كم سامعه مثل هالسالفه

الله يعين ويهديهم


تسلم على التعليق الطيب يا معرووف شاكره لك تواجدك الزين ,,,